قبل ما تقرأ التعليق: دي مش دعوة للتخريب

في الفترة بين 6 أغسطس لـ 10 أغسطس خرجت مظاهرات احتجاجية عنيفة في العاصمة البريطانية احتجاجا على مقتل شاب يوم 4 أغسطس. المظاهرات كانت عنيفة وشارك فيها الآلاف اللي كانوا بيشتبكوا بشكل مباشر مع الشرطة وقاموا بسرقة وإحراق المباني، والتقارير النهائية للأحداث أكدت تعرض أكتر من 100 منزل للاحراق أو السرقة وحرق 4 أوتوبيات نقبل عام. الخسائر الاقتصادية نتيجة الحرائق اللي نشبت تجاوزت المليار جنيه مصري. الأحداث ومع دمويتها وعنفها تسببت في مقتل 5 وإصابة 16 متظاهر فقط خلال أربعة أيام.

حاول تقارن ده مع اللي حصل في مصر خلال 4 أيام برضه، الخسائر الاقتصادية الخاصة بالمباني والشارع في منطقة شارع محمد محمود مش هتتجاوز مئات اآلاف أو ملايين قليلة على أقصى تقدير لأن المعركة مع الأمن كانت معركة مش غرضها التخريب أو السرقة، ومع ذلك عدد القتلى زاد على 40 والمصابين أكتر من 1000!

ده باختصار الفارق بين دولة فيها سلطات بتحترم القانون ورجال أمن بيطبقوه وعارفين إنهم هيتعاقبوا لو خالفواه وبرضه عارفين قيمة حياة الإنسان حتى ولو كان بلطجي ومخرّب. دي مش دعوة للتخريب أو للبلطجة بس دي دعوة للتفكير في طريقة إدارة الأمن في مصر وطريقة التعامل مع المواطن المصري كرقم بنشوفه في أعداد المتوفين أو المصابين